На конкурс “Сельской газеты” “Радок пра родны куток”

ЖЭНIН ВЕРШ НАД КРАЕМ

Пэўны час, пачынаючы з 1976 года, вядомая беларуская паэтэса Яўгенія Янішчыц працавала літкансультантам “Сельской газеты”. Верш напісаны з нагоды выхаду ў свет 2-га тома чатырохтомніка “Яўгенія ЯНIШЧЫЦ. Творы. Жыццяпіс. Каментарыі”.

Агарнуў Палессе смутак –

Упала ластаўка з гнязда.

Ніхто не ведаў, а чаму так

Да нас скацілася бяда.

Зямелька ж родная трымала

Яе між моцных каранёў,

Ды дзён бясхмарных вельмі мала

Паслаў ад сонца ёй анёл.

Затое талент шчодра песціў

Куток ля Ясельды-ракі.

Калыску ў хату, гоман, песні

Ёй з бацькам неслі землякі.

Пяром барозны клала Жэня,

Што верш, што колас – заадно,

Паэтаў з вёскі нараджэнне

Вітала сэрцам і радком.

Так стала “Сельская газета”

Жаданым птахам для радка.

Вясновым сонейкам да лета,

У жнівень – святам для сярпа.

Зямное ж толькі прыцягненне

Забрала ластаўку ад нас

Паверхам восьмым, а збавеннем

Стаў асфальт, а не Парнас.

Жыла б яна у роднай хаце

З акном на Ясельду і луг,

Было б сапраўднае багацце –

Бацькоўскі кут, пяро і плуг.

Дарэмна вёскі пакідаем,

Спяшым па хісткай кладцы ў свет.

Ды будзе Жэнін верш над краем

Гарэць, як сонейка, найперш.

Мікола ПАНАСЮК
г. Брэст

27 студзеня 2018 г.