Віншуем з Днём нараджэння!

 

Нашаму таленавітаму брэсцкаму паэту, слыннаму пісьменніку-дакументалісту Міколе Панасюку ад імя ўсяго Брэсцкага аддзялення Саюза пісьменнікаў Беларусі шлем шчырые віншаванне з Днём нараджэння і выказваем сардэчнае прызнанне і ўдзячнасць за яго вернае служэнне выбранай справе: працы ў журналістыцы, літаратуры на карысць Радзіме, народу, роднай мове.

Зычым бездакорнага здароўя, актыўнага даўгалецця, Божай падтрымкі на кожным кроку! А яшчэ – вясновага настрою, прамяністага сонца, узнёслага натхнення і новых творчых перамог на літаратурнай ніве!

Таццяна Дземідовіч,

старшыня Брэсцкага аддзялення

Саюза пісьменнікаў Беларусі

Да Дня нараджэння слаўнага
сына і песняра беларускага народа,
слыннага паэта-берасцейца,
шаноўнага Міколы Панасюка  

   

         З ідэяй міру і дабра

Як толькі збегла прэч зіма

І ў небе сонца ажыло,

Яго шчаслівая вясна

Прынесла ў роднае сяло.

Гасподзь з блакітнай вышыні

Той, сакавіцкаю парой,

Паслаў дзіцятку дабрыні,

Благаславіў святой зарой.

І творчым дарам надзяліў,

Каб родны кут і край апеў, 

Каб так Айчыну палюбіў,

Што разлюбіць ужо не смеў.

Ды люд не знаў, што немаўля –

Як падрасце, як прыйдзе час –

Натхніць бацькоўская зямля,

Пакліча зваблівы Парнас.

       

І ўжо адтуль, бы рупар той,

З ідэяй міру і дабра

На мове матчынай жывой

У неба вымаліць святла.

Напіша стосы добрых кніг

Пра чалавечае жыццё,

Аб сіле духу, дабрыні

Распавядае з пачуццём.

Сваё Палессе апяе

І роду любасны выток,

Які й цяпер сіл надае,

Гукае ў бацькавы куток.

Сардэчнай ласкі да людзей       

Ён ад бацькоў сабе прыдбаў                        

І, як сапраўдны дабрадзей,   

З усёй душой зашчыраваў…

Ён і цяпер такі ж, як быў, –

Спагадны, чулы да людзей,  

Душы багацце не згубіў,

Яно за ім услед ідзе.

   

І мары мкнуцца да нябёс –

Туды, дзе рдзееца зара…

Няхай спрыяльным будзе лёс

Паэта, творцы, песняра!

Надзея ПАРЧУК 

 

Да усіх пажаданняў далучаецца і найлепшы 

сябар Аляксей Скакун, які кожны год 

з самай раніцы тэлефануе першым.