Земля-Космос-Земля

Да зорных высяў праз магніт…

Маўчаць як добра ў цішыні

На ўскрайку поля між бяроз,

Учора гэтак расчыніў

Акно ў маленства, чыстых рос.

Бо сок бярозавы дае

Мне моц для сэрца і радка,

А словы многія свае

Гатоў аддаць для жаўрука.

Хай сыпле ён іх з вышыні

Для тых, хто кволы ад пакут,

А гай бярозавы між ніў

Шануе наш палескі кут.

Ад снегу – белая зямля,

Бярозы беляць наш прастор.

Ніколі я не адмаўляў

Суседства іх пад кронай зор.

Паэт − ён той жа касманаўт

Са скруткам сонечных арбіт –

З усіх зямных глыбокіх шахт

Да зорных высяў праз магніт.

Мікола ПАНАСЮК
2 студзеня 2018 года