І лірык, і філосаф, і добры гаспадар… Так можна сказаць
пра таленавітага паэта з Лунінца Андрэя Мазько, творчая сустрэча з якім
адбылася напрыканцы лістапада ў Брэсцкай гарадской бібліятэцы імя А.С. Пушкіна.
Андрэй Іванавіч Мазько нарадзіўся ў в.
Упірава Іванаўскага раёна Брэсцкай вобласці. Выхоўваўся і вучыўся ў Гарадзецкай,
Жабінкаўскай ды Пружанскай школах-інтэрнатах.
У 1977 годзе
закончыў з адзнакаю Беларускі інстытут механізацыі сельскай гаспадаркі ў Мінску,
а да 1982 года працаваў галоўным
інжынерам калгаса “Кастрычнік” Іванаўскага раёна. Адначасова без адрыву ад
вытворчасці завяршыў вучобу ў аспірантуры БІМСГ. Узначальваў аддзел па
эканоміцы і рыначных адносінах, упраўленне гарадской гаспадаркі, працаваў
начальнікам упраўлення жыллёва-камунальнай гаспадаркі, будаўніцтва і
архітэктуры Іванаўскага райвыканкама, намеснікам старшыні Лунінецкага
райвыканкама.
Ён аўтар
паэтычных зборнікаў “Жывы калодзеж”, “Днi i ночы мае”, шматлікіх публікацый у калектыўных кнігах,
часопісах, альманахах, газетах рэспубліканскага, абласнога і раённага ўзроўню.
Андрэй Мазько – таксама наш
сапраўдны сцэнічны артыст, песеннік, паэт, актывіст творчай літаратурнай суполкі,
а таму шмат ездзіць па берасцейскаму рэгіёну, часта выступае перад чытачамі,
улюбёнымі ў мастацкага слова, беларускую мову, паэзію. Сёлета прымаў удзел у
святкаванні Дня беларускага пісьменства, якое праводзілася ў Полацку, што ў Віцебскай вобласці.
Свае актавыя залы, вучэбныя
класы, сцэнічныя пляцоўкі паэту ахвотна прапануюць гарадскіе бібліятэкі, школы,
палацы культуры ў райцэнрах. І скрозь ён жаданы і паважаны госць.
Вось і гэтым разам Андрэй
Іванавіч амаль дзве гадзіны трымаў у эмацыянальным палоне сваіх чарговых слухачоў-брастаўчан
– прыхільнікаў паэзіі, пранікнёна чытаў ім вершы, шчыра дзяліўся з прысутнымі
сваімі пачуццямі, жыццёвым вопытам, шматгадовымі назіраннямі. Рассказаў паэт і
пра цеснае супрацоўніцства з вядомым брэсцкім кампазітарам Васілём Кандрасюком,
з якім яны стварылі не адну песеню. Прадаўжалі б тварыць і далей, але жыццё
кампазітара нечакана абарвалося ў 2013 годзе…
На творчай сустрэчы прысутнічала
моладзь з Брэсцкага каледжа бізнесу і права. Менавіта для падрастаючага
пакалення паэт знайшоў мудрыя і важкія словы, засяродзіў увагу на тым, якую
вялікую ролю маюць ў жыцці чалавека сям’я, родны куточак, як неабходна ўсё
жыццё заставацца рупліўцам на працы, а
заадно адказна ставіцца да любых даручаных спраў.
Маладыя людзі ўважліва і з
вялікай цікавасцю слухалі паэта, задавалі госцю розныя пытанні, у тым ліку і пра літаратурную
творчасць, натхненне і ўменне сумяшчаць адказную працу з паэзіяй.
Падтрымаць майстра слова ў залу
завіталі сябры і калегі па пяры. Гэта – Аляксандр Валковіч, Зінаіда Дудзюк,
Любоў Красеўская, Мікола Панасюк, Таццяна Шульга. Так старшыня Брэсцкага
абласнога аддзялення Саюза пісьменнікаў Беларусі Таццяна Дземідовіч са шчырасцю
падкрэсліла, што творчасць Андрэя Мазько – лірычна-кранальная і шчымліва-крынічная.
Асабістыя пачуцці, перажыванні, думкі паэта набываюць незвычайную глыбіню і
шырокую маштабнасць, бо кожны аўтарскі радок, кожная страфа напоўнены асаблівай
цеплынёй і любоўю да сваёй Бацьбкаўшчыны, роднай Беларусі, дарагіх землякоў,
любай сэрцу маленькай Радзімы. А проч усяго, у творчасці Андрэя Мазько ёсць
моцная апора, гэта – паэтычны талент, нязломная воля і імкненне з кожным разам
узняцца на прыступку вышэй. І гэтая душэўная сіла, сардэчная прыгажосць і
пяшчота, паэтычная крылатасць аўтара прыцягваюць і заварожваюць душу чытача.
Напрыканцы творчай вечарыны як
аматар песеннага жанру Андрэй Іванавіч усім прысутным узняў бадзёры настрой
добрай песняй, выконваючы яе пад гітару.
Надзея Парчук,
сябра Саюза пісьменнікаў Беларусі
У час сустрэчы…
Фота Дзяніса БУСЛЁНКА
Творческая встреча с Андреем Мазько
23 ноября в 14.00 в Центральной городской библиотеке им. А.С. ПушкинаСМОТРЕТЬ ФОТО >>>
/